Жергілікті «Қазақ тілі» қоғамының мүшелері Ш.Айманов мектебі ұйымдастырған «Ертіс-Баян өңірінің әдебиеті» атты факультативті сабағында қонақ болдық. Ордалы білімнің қарашаңырағы құшақ жая қарсы алды.
Оқушылармен қазақ тілінің жай-күйі туралы әңгіме өрбітіп, авторлық өлең оқып, аталмыш мектептің кітапхана сөресіне «Ұлтымның құрсағы алтын құт анасы» атты өңірімізде жарық көрген антологияны табыс еттік. Антологияда ауданымыз бен облысқа белгілі ақындардан бөлек, республикаға танылып жүрген шайырлардың жырлары жарық көрген еді. Осы мектептің шәкірті, талапты оқушы Ернұр Қанаш та өз шығармашылығынан шашу шашты. Ш.Айманов мектебінің оқушылары сұхбат барысында белсенділігімен байқалды. Олар өнер, тіл, әдебиет һәм мәдениет сияқты салаларда есті сұрақтар қойды. Қойылған сұрақтарға лайықты жауап беруге тырысып бақтық. Көксегеніміз қазақ тілінің дамуы екенін саналарына сіңіруге тырыстық.
Оқушылармен дидарластырған мектеп ұстазы Елмира Мергенбайқызына алғыс білдіреміз! Осы форматтағы кездесу-жиындар әлі де болады деп сенеміз.
Мұсабек СЕЙСЕНБЕКҰЛЫ,
Халықаралық «Қазақ тілі қоғамы»
қоғамдық бірлестігінің Баянауыл аудандық
филиалының төрағасы.
Add a Comment